ബെംഗളൂരു: പി.യു. രണ്ടാംവർഷ പരീക്ഷയിൽ പരാജയപ്പെട്ടതിനെത്തുടർന്ന് സംസ്ഥാനത്തെ വിവിധ ജില്ലകളിലായി മൂന്നുവിദ്യാർഥികൾ സ്വയം ജീവനൊടുക്കി.
ദാവണഗരെ സ്വദേശി മഞ്ജുനാഥിനെ (18) വീട്ടിനുള്ളിൽ ഫാനിൽ തൂങ്ങിയ നിലയിലാണ് കണ്ടെത്തിയത്. സ്വകാര്യ പി.യു. കോളേജിലെ വിദ്യാർഥിയാണ്.
ശിവമോഗ ചിക്കമരാസ സ്വദേശിയായ ചിത്ര (18) യെ കിടപ്പുമുറിയിൽ മരിച്ച നിലയിൽ കണ്ടെത്തി.
പരീക്ഷയിൽ ചില വിഷയങ്ങൾക്ക് കുട്ടി പരാജയപ്പെട്ടിരുന്നു.
ഹാസൻ അരക്കലഗുഡ് സ്വദേശി ഭൂമിക (18) യെ വിഷം കഴിച്ചനിലയിലാണ്‌ കണ്ടെത്തിയത്.
തൊട്ടടുത്ത ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കഴിഞ്ഞദിവസം പ്രസിദ്ധീകരിച്ച രണ്ടാംവർഷ പി.യു. പരീക്ഷയിൽ വിജയിക്കാൻ കഴിയാത്തതിനാൽ കടുത്ത മാനസിക സമ്മർദത്തിലായിരുന്നു വിദ്യാർഥിയെന്ന് പോലീസ് പറഞ്ഞു.
പി.യു. രണ്ടാംവർഷ പരീക്ഷാഫലം ചൊവ്വാഴ്ചയാണ് പ്രസിദ്ധീകരിച്ചത്.
വിജയിക്കാത്ത വിഷയങ്ങൾ സേ പരീക്ഷയിലൂടെ എഴുതിയെടുക്കാം. ഓഗസ്റ്റ് അവസാന ആഴ്ചയോടെ സേ പരീക്ഷകൾ നടക്കും.
